Liebi Gmaind

Am Schluss vom Gottesdienst git s en Säge, und au „Peace“, wenn mer s eso maint, isch uf en Art en Sägens’gruess.

Peace, Love und Happiness sind de Konfirmande in Sinn cho, nachdem mir s Motto Flowerpower gfunde hend. D Chraft vo de Blüemli isch es ehnder lockers Motto. Für di ainte Konfirmande isch es mit Inhalt verbunde. Für di andere isch es es Dekorationsschema.

Für d Generation vo de Konfirmande-Eltere isch Flowerpower zuesätzlich mit Erinnerige verbunde.

Erinnerige an e Bewegig, wo us Amerika zu ois übere cho isch, wiä so vili Bewegige vorher und au sither. Politischi Aaligge wiä öpe dr Protest gege dr Vietnam‘chriäg händ sich vermischt mit ere gsellschaftliche Uufbruchs’stimmig.

Über Droge und freii Liäbi hett mer breit diskutiert. Und nöd immer isch es bim drüber-rede blibe.

En sichtbare Uusdruck vo dr noie Iistellig sind di langi Hoor gsi, wo nöd nur Hippies in San Francisco, sondern au KV-Stift in Züri sich wachse loh händ. Das isch damals en Fortschritt gsi. En Fortschritt, wo vo de Söhn und Töchter vo de damalige Flowerpower-Lüüt kritisch berurteilt wird. Si sind im allgemeine froh, wenn ihri Vätere hüt wieder churzi Hoor händ.

Dr Unterschied isch allerdings, dass es hüt in erster Linie e Stilfrog isch, ob en Maa langi oder churzi Hoor hät. Verschiedeni gsellschaftlichi Konventione sind uufbroche worde. Vilicht isch d Schwiz im Zug vo dr Flowerpower-Bewegig tatsächlich es birebitzeli lockerer worde.

Wenn s Pendel in di aint Richtig uus’gschlage hett, schwingt’s in di ander Richtig zrugg. Ei gsellschaftlichi Konvention, wo im Gefolge vo dr Flowerpower-Ziit uufbroche worde isch, betrifft s Zsämeläbe. Vor 35 Johr hett aim dr Vermieter chöne d Wohnig künde und ain uf d Stross stelle, wenn er eine „wilde Ehe“ diagnostiziert hett. Hüt isch es dr Normalfall, dass mer zerst in wilder Ehe, oder wiä mer hüt sait im Konkubinat zsämeläbt, bevor mer, wenn überhaupt, hürotet.

Sitte’zerfall? Von wegen. Di 15 jährige vo hüt finded Troii in ere Bezüchig vil wichtiger als das ihri Bapis und Mamis gfunde hend, wo si sälber 15i gsi sind. - Wenigstens säged das d Mainigsumfroge!

 Das Wort Treue hätt vermuetlich hüt ganz en andere Klang, als es ziitwiis dr Fall gsi isch.

 Wenn mer Treui als Iischränkig empfindet, hett s en negative Klang, denn wer will sich scho iischränke loh. In dr Flowerpower-Ziit hett mer gege Iischränkige kämpft. Nach em Motto: niemert hätt mir vor’z’schriibe, wiä ich mis Privatläbe organisiere!

 Für di hütige Jugendliche hett s Wort Troii mehrheitlich en positive Klang. Das isch meileweit ewäg vom „everyone with everybody“-Prinzip us dr Flowerpower-Ziit.  

Dass mer sich in ere Partnerschaft Vertraue schenkt, isch um so wichtiger, wil dr üsseri Zwang immer meh abnimmt.

Wenn e Bezüchig nöd dur Zwang vo usse zsämepresst wird, denn mues dr Zsämehalt vo inne cho. D Partner münd aktiv werde und sogenannti Bezüchigs’arbet leiste.

Wenn s kais Gfäss meh git, wo aim vo usse umschlüsst, denn entscheidet dr inneri Zsämehalt.

Sinngemäss chan mer das uf d Chile überträge:

D Zueghörigkeit zunere Chile isch hüt nüme en gsellschaftliche Zwang.

Währenddem s Müese in Hintergrund tritt, chummt s Dörfe zum Vorschii.

Statt d Iischränkig z beklage, freut mer sich, dass mer aimet derzue’g’hört.

Das hätt Konsequenze bis in Konfirmande’unterricht. Wil s Derzue’g’höre nüme automatisch gewährleistet isch, mues am Zuegehörigkeitsgfühl gschaffet werde.

Dr Konfirmande’unterricht heisst zwar Unterricht. Was in dene Stunde erarbeitet wird, söll aber nöd Papier bliibe oder aifach uf Vorrat für spöter emol glernt werde. Möglichst vil vo dem, was mer macht, söll im Moment zunere Integration is Chilegmaindläbe füehre.

E rain passivi Methode wär, d Lüüt nur dur en Anzahl Gottesdienst dure’z’schloise.

Wer hüt konfirmiert wird, hät aber im ablaufende Johr bi 4-5 Gottesdienst aktiv mitgwirkt.

Standardthemene wiä „Gebät“ und „Glaube“ werded nöd abgschafft. Sondern das, wo bi de Unterrichts’stunde use’chummt, wird ins gottesdienstliche Läbe integriert: Nöd erst als Abschluss in dr Konfirmation, sondern scho vorher.

Dass mer zäme Wiehnachtsfenster bastlet und Abzeiche für dr Bazar entwirft und nochher au no herstellt, das isch nüt revolutionär Nois. Aber was mer früener vilicht emol intuitiv iibaut hett, das hät hüt System.

(Das isch umso wichtiger, wil s praktisch unmöglich worde isch, im Konfjohr usserhalb vo Konfstunde und Gottesdienst no irgendöpis z veranstalte.)

Liebi Gmaind

Flowerpower. D Energie vo de Blueme. Dodrzue ghört au e gwüssi Lockerheit.

 Uf em Wäg mues mer zwar vil organisiere und plane.

 Aber irgendwo chummt dr Punkt, wo mer das gmacht hett, was mer hett chöne mache; und denn mues mer losloh...

...losloh im Vertraue, dass nach em Wägfall vom üssere Gfäss d Substanz erhalte bliibt;

 ...losloh im Vertraue, dass das, wo entstande isch, verhebet und dass es trait.

AMEN.