Predigttext Micha 5,1-3

(1)Doch dir, Betlehem im Gebiet der Sippe Efrat, lässt der Herr sagen: „So klein du bist unter den Städten in Juda, aus dir wird der künftige Herrscher über mein Volk Israel kommen. Sein Ursprung liegt in ferner Vergangenheit, in den Tagen der Urzeit.“

(2)Der Herr gibt sein Volk den Feinden preis, bis eine Frau den erwarteten Sohn zur Welt bringt. Dann werden die Verschleppten, die noch am Leben sind, zu den anderen Israeliten zurückkehren.

(3)Im höchsten Auftrag des Herrn, seines Gottes, und mit der Kraft, die der Herr im gibt, wird er die Leute von Israel schützen und leiten. Sie werden in Sicherheit leben können, weil alle Völker der Erde seine Macht anerkennen.

Liäbi Gmaind,

dr Prophet Micha hätt im 8. Johrhundert vor Christus g’läbt. Sini prophetische Uus’sprüch sind über d Ziit vo drei Könige ver’teilt. Nach’enand händ im Halbkönigtum Juda dr König Jotam, dr König Ahas und dr König Hiskija regiärt.

Us em Rückblick betrachtet wäred di erste zwei vo däne drei eigentlich „Halb-Könige“ gsi. Si händ nur d Hälfti vom Volk regiärt, nämlich di baide Stämm Juda und Benjamin mit dr Haupt’stadt Jerusalem.

Dr dritti vo däne drei, dr König Hiskija, hät als Halb-König aa’gfange und als Ganz-König uuf’ghört. Und das, ohni Land derzuä’z’gwünne oder derzuä’z’erobere!

Wiä chan das goh?

Ganz aifach: di anderi Hälfti vo Israel, s König’riich vo Nord’israel mit dr Haupt’stadt Samaria, isch ab’hande cho.

D Assyrer händ s nördliche Halb’könig’riich eroberet.

Statt eme israelitische Halb-König hätt vo döt aa en irakische Statt’halter über Nord’israel regiärt, en Tail vo dr Bevölkerig isch derbi uus’tuuscht worde. Nord’israelite händ müse in d Fremdi. Fremdi sind derfür nach Nord’israel ver’schleppt worde. Was dr brutali Diktator Josef Stalin im vergangene Johrhundert mit de Völker im Kaukasus g’macht hätt, das hätt er nöd sälber er’funde. Knapp drei Johr’tuusig früäner händ d Assyrer das Prinzip, erobereti Völker mitenand z vertuusche, erfunde gha. Ent'wurzleti Mensche mached kain Uuf’stand, das isch d Idee gsi.

Zrugg in d Vergange’heit. Mängisch isch d Leistig vomene Mänsch aifach diä, das er über’läbt.

Dr Halbkönig im Süde vo Israel, dr Hiskija, isch plötzlich dr ainzig Halb’könig gsi. Und wenn s kain andere Halb’könig meh git, wil s Riich im Norde vo dr Land’karte ver’schwunde isch, denn wird mer automatisch zum Ganz-König. Mer wird zum Ganz-König vom Reste. 

Öpert, wo realistisch dänkt, stellt sich in sonere Situation d Frog: bin ich nöd aifach dr nächst? Holed sich d Iraker nach em Norde nöd au no dr Süde?

Dr Rest-König Hiskja hätt sich diä Frog g’stellt. Er hätt Zwiifel gha.

Dr Prophet Micha macht em König Muät.

Er sait ihm diä Värs, wo ich Ihne am Aafang vor’g’läse han.

Er hätt das offe’bar nöd nur em König, sondern uf de Strosse und Plätz generell dr Bevölkerig g’sait.

Maistens hätt dr Prophet Micha d Lüüt kritisiärt.

Das händ diä sich nöd büte loh.

Dr Prophet Micha sälber hätt d Reaktion vo dr Bevölkerig uf sini Mahn’predigte uuf’gschribe: „Hör auf mit dem Gesabber! ... So spricht man nicht mit den Nachkommen Jakobs.“ – Als „Gesabber“ händ d Zuä‘hörer d Wort vom Micha empfunde, und als Zuä‘muätig: ‚So redet mer nöd mit üüs Nachfahre vom Stammvater Jakob!‘ – Was dr Micha in oisem Predigt’text gsait hätt, wiicht vo sim übliche Muster ab. Er kritisiärt nöd, sondern er redet de Israelite guät zuä.

Er ermuätigt sii.

Und er ermuätigt dr ver’blibeni König: „Du bisch nöd dr letzt Nach’fahr vom König David, wo uf em Thron sitzt“, sait er ihm. „Us dr Davids’stadt Beth’lehem wird au nach dir en König cho. Aber dem zuäkünftige König siin Ursprung isch nöd bloss dr König David, wo d Dynastie vo de Davids-Könige g’ründet hätt. Dr Ursprung vom zuäkünftige König ligt in ferner Vergange’heit, in de Tääg vo dr Ur’ziit!“

Liäbi Gmaind, was hätt ächt dr König Hiskija dänkt, wo dr Prophet Micha diä Aakündigung g’macht hätt?

Vilicht isch er er‘liichteret gsi, dass dr Prophet nöd dr Untergang heruf’be’schwört.

Anderersiits, ver’wirrend isch das gliich: Was söll das, en König us grauer Vorziit, us dr Urziit, wo‘s doch no gar kain König gee hett? En König us dr Nach’komme’schaft vom David, wo aber vil älter isch als dr David? Dr David isch doch dr erst König us sinere Familiä gsi, en vor’herige König us dr Davids’stadt cha s also gar nöd gee.

Und gliich söll där vor’herigi König in Zuäkunft regiäre.

Isch das e Aakunft, wenn der König denn chummt?

Scho, aber es isch au irgend’wiä e Wiederkunft, wenn der zuäkünftigi König aa’chummt! Er isch irgend’wiä scho doh gsi, in ferner Ver’gange’heit, in de Täg vo dr Ur’ziit...

So ganz tröstlich sind d Wort vom Prophet nöd, denn dr Trost vo Gott isch meh als e blossi Be’schwichtigung...

Dr Micha sait em König nöd: alles wird guät, reg di nöd uuf.

Sogar in dr Stress’situation vo dr Be’drohig er‘wartet dr Prophet Micha vom König noh, dass där erstens genau zuä’loset und zwaitens Kritik ver’trait.

Und diä Kritik haisst: „Der Herr gibt sein Volk den Feinden preis, bis eine Frau den erwarteten Sohn zur Welt bringt.“

Bis dr zuäkünftigi König chummt, muäs dr jetztigi König no une’dure. S Volk stoht unter em Druck vo de Fiind, bis där König chummt, wo d Frei’heit bringt und wo s Volk vo Gott uf där ganze Welt zsäme’füährt.

Das isch e unhöflichi Prophe‘zei’ig gegenüber em bedrohte König Hiskija.

In dr Situation vom drohende Untergang au no vo sim halbe König’riich sait ihm dr Prophet: du nennsch dich zwar König.

Aber du bisch gar kain richtige König.

Dr richtigi König regiärt über s Volk vo Gott uf dr ganze Wält.

Dr richtigi König bringt uf dr ganze Wält Schutz, Laitig und Sicher’heit. -

Liäbi Gmaind,

für ois isch offe’sichtlich, was dr Prophet Micha predigt hätt.

Für ois isch dr zuäkünftigi König Jesus Christus.

Er isch nöd nur en Nachfahr vom König, sondern scho vor ihm doh gsi.

In sinere menschliche Natur g’hört Jesus zur Nach’komme’schaft vom David.

In sinere göttliche Natur chummt er vo Gott.

Und wil Gott ewig isch, spilt er bereits am Aafang vo oiserer Ziit’rächnig e Rolle.

Scho bi dr Erschaffig vo dr Wält isch er derbi gsi: „In ferner Vergangenheit, in den Tagen der Urzeit.“

D König Hiskija hätt vilicht über es paar Hundert’tuusig Unter’tane regiärt.

Als Retter vo dr ganze Wält hätt er sich sälber nöd chöne be’zaichne – er isch froh gsi, wenn er sich sälber hätt chöne rette.

Als Retter vo dr ganze Wält dörfed mir Jesus bezaichne.

Er hätt nöd sich sälber g’rettet, sondern di ganz Mensch’heit.

Sis König’tum isch wält’wiit – s Evangelium hätt sich ver’breitet und breitet sich au jetzt no uus.

An Wiähnachte fiired mir dr Ziit’punkt, wo d Verheissig vom Prophet Micha uf d Wält choo isch.

Es isch sichtbar worde in dr Fuäter’chrippe, was en un’gliäbte Mahner 700 Johr fruäner in rätsel’hafte Wort aa’kündiget hätt.

Es Rätsel isch es für ois nüme, s Rätsel isch g’löst.

Jetzt isch es es Wunder.

Us em Rätsel isch es Wunder worde.

Vorhär isch d Ziit vom Froge gsi: was bedütet diä Prophetie?

Jetzt isch d Ziit vom Stuune: „Wenn ich dies Wunder fassen will, dann steht mein Geist vor Ehrfurcht still“.

Es isch wiä bimene Päckli, bimene g’lungene G’schänk.

Solang mer s nonig uus’packt hätt, frögt mer sich: was isch ächt drin in däm Päckli? Was isch dr Inhalt vo däm Rätsel?

Sobald mer denn s Päckli uuf’gmacht hätt, isch d Frog nach em Inhalt beantwortet.

Mit dr Antwort uf d Frage vom Wüsse isch aber dr Zweck vom Gschenk nonig erfüllt, im Gege’tail: jetzt fangt’s erst richtig aa.

Jetzt, wo mer g‘seht, was mer bechoo hätt, freut mer sich draa, mer stuunt, mer isch isch glücklich.

Es schöns Gschänk, wo mer uuspackt hätt, chan mer andächtig betrachte.

Diä, wo aim s Geschänk g’macht händ, froied sich natürlich au, wenn mer Danke sait.

So froit sich sicher au Gott, wenn mir ihm für sis Wiähnachts’gschänk an ois danked.

AMEN.

Liturgie

01Eingangsspiel Orgel

02Gruss

03Lied EG EG 400,1-3.7.9 „Fröhlich soll mein Herze springen“

04(stehend / gemeinsam) EG 218 „Gloria“

05Gesangsterzett (1/3)

06Schriftlesung: Lukas 2,1-20

07Lied EG 421,1-5 „Weil Gott in tiefster Nacht erschienen“

08Predigt über Micha 5,1-4a

09Gesangsterzett (2/3)

10Danksagung

11(stehend / gemeinsam) Unser Vater

12Einsetzungsworte

13Lied EG 417,1-3 „Chum, mir wänd em Heiland singe“

14(die HelferInnen treten herzu) Austeilung an die HelferInnen (Gemeinschaftskelch)

15Austeilung an die Gemeinde (sitzend / Einzelkelch / Orgelspiel)

16(stehend) Dankgebet (die HelferInnen setzen sich)

17Text des folgenden Liedvortrages

18Gesangsterzett (3/3)

19Abkündigung Frau Milly Rüttimann

20Leidstrophe EG 674,3

21Kollekte: KR Weihnachten

22Mitteilungen: Schlieren. Silvester. 02-01-2005

23(stehend) Segen

24(sitzend) Ausgangsspiel