(8b)Lebt nun auch als Menschen des Lichts!

(9)Aus dem Licht erwächst als Frucht jede Art von Güte, Rechtschaffenheit und Treue.

(10)Fragt immer, was dem Herrn gefällt!

(11)Beteiligt euch nicht an dem finsteren Treiben, das keine Frucht hervorbringt. Im Gegenteil, deckt es auf!

(12)Man muss sich schämen, auch nur zu nennen, was manche heimlich tun.

(13)Wenn es aber vom Licht, das ihr ausstrahlt, aufgedeckt wird, kommt es ans Licht.

(14)Und was ans Licht kommt, wird selbst Licht. Darum singen wir:
„Wach auf, du Schläfer!
Steh auf vom Tod!
Und Christus, deine Sonne,
geht für dich auf.“

Liäbi Gmaind,

Liächt isch s zentrale Thema im Predigttext. Es git es Liächt, wo mer als Mensch derzuä’g’höre chan. Und denn isch mer „ein Mensch des Lichts“. In ältere Bibelübersetzige wird das wider‘gee mit „Kind des Lichts“. Us em Liächt gebore z sii, das isch scho fast e esoterischi Idee.

Jetzt würd mer eigentlich meine, jede wüssi, was Liächt isch. Wichtig im Moment isch allerdings, was für dr Verfasser vom Epheserbrief Liächt gsi isch.

Mini Schuälferiä als Teenager han ich zum Teil imene alte Walserhuus im Schanfigger Siite’tal Fondei verbrocht. Dr Götti-Unkel vo minere Schwöster und min Vater händ diä leer‘stehendi Walserhütte nodisno renoviärt und en Art Ferie’huus druus g’macht. Wenn oisi Familie döt obe gsi isch, denn isch es am Obig plötzlich finster gsi, und bloss e Petroleumlampe über em Esstisch hätt d Stube no belüchtet. Vorusse hätt mer zum Liächt gseh müse an Sternehimmel luäge. Wiit wäg hät mer zwar en Wiler gseh, aber das bewohnte Huus döt hät in d Wand vo dr nächtliche Dunkelheit nur es paar Liächtfläcke vo de belüchtete Fenster g’lait. Wenn mer am Obig gar nöd eso spöt no us em Huus hätt welle, denn hätt’s e Taschelampe brucht für das.

Liäbi Gmaind,

wiä jetzt s Dunkel amene Obig im Bündner Bergtal Fondei uus’g’seht, weiss ich nöd. Vilicht isch där Wiler, wo diä Walserhütte stoht, in dr Zwische’ziit elektrifiziärt worde. Scho won ich als Jugendliche obe gsi bin, sind am Tag hüüfig Helikopter mit Baumaterial in das Tal gfloge. Ich stell mir vor, öpert wo sich en Hubschrauber mietet zum Baumaterial für es Huus in es Tal bringe, där möcht am Schluss denn au e richtig schöni moderni Stromleitig haa. Us Nostalgie’gründ hängkt denn sicher irgendwo im Huus no e Petroleum’lampe. Aber s Gebruuchs’liächt isch ehnder elektrisch.

Dr Hintergrund vom Epheser’briäf isch finster. Zumindest inere mondlose Nacht. Zwar hätts in de römische Städt für damaligi Verhältnis vil Liächt gha. Es hätt teilwiis sogar öffentlichi Belüchtige gee mit Fackle.

Usserhalb vo de Städt isch finster gsi.

Je meh Liächt, desto zivilisiärter und desto sicherer.

Je meh Liächt, desto weniger Unannehmlichkeit und desto weniger Angst.

Das isch s Liächt’verständnis, wo dr Epheser’briäf bi sine Empfänger voruus’setzt.

Dass mer nöd schlofe chan, wil s z hell isch; dass mer d Aazeig vom Radiowecker vom Bett wäg drähe muäs, wil ein suscht d Lücht’ziffere blended; dass aim e Strosse‘laterne in dr Nacht dur di zogene Vorhäng dure is Gsicht zündet – settigi Liächt’problem händ di alte Epheser nöd gha.

Si händ anderi Problem gha, aber nöd diä.

Liächt isch also - so wiä’s im Predigt’text g’maint isch - öpis, wo mer niä gnuäg haa chan dervoo.

Liächt, vil Liächt, no meh Liächt! Dass mer sich aines Tages nach augä’schonender und nerve’entlastender totaler Finsternis sehne chönti, das wär für sonen Epheser en erstuunlichi Erkenntnis gsi.

Also, mir sölled als Menschen des Lichts leben. Heisst’s do. Und damit mer s e chli genauer hätt, wärded d Konsequenze vom Liächt beschribe.

Döt, wo s hell isch, döt isch mer guätig, mer isch rechtschaffen und mer isch treu.

Güätigkeit: Sobald mer Zuäschauer hett, isch es aifacher, grosszügig z sii.

Rechtschaffenheit: das isch di strof’rächtlich relevant Version vom Aastand. Je grösser d Chance isch, dass krummi Gschäft uuf’deckt werded, desto aifacher isch es, suuber z bliibe.

Wenn mer dermit rächne muäs, dass mer mit dr Hand in dr Guätzli’büchs g’filmt wird, chan mer dr Versuächig besser widerstoh.

Treu sii isch im grelle Liächt vom Schiinwerferkegel ebefalls tendentiell aifacher.

Dr Vers 11 erinneret mich an e Schwizerischi Publikation, wo scho druckt worde isch, bevor am Fernseh d Sendig Kasse’sturz ii’g’füährt worde isch, und wo s immer no git: das isch s Heftli „Der Beobachter“.

Dr passend Bibelvers, wo als Leitmotto dure’goo chönnti, luutet wiä folgt:

„Beteiligt euch nicht an dem finsteren Treiben, das keine Frucht hervorbringt. Im Gegenteil, deckt es auf!“

Där Värs isch e ständigi Mahnig. Denn obwohl s scho vili Johr Kasse’sturz und Beobachter git, sind beidi nach wiä vor nötig.

In dem Läbens’bereich git’s immer nonig z’vil Liächt.

Möglicherwiis lönd sich nöd ali Lüüt dervo abhalte, Finsters im Schild z fuähre, bloss wil si mit Ent‘hüllig rächne müänd.

Di ainte glaubed, dass mer jede Übeltäter ver’wütscht, uus’g‘noh si sälber.

Mängi dänked bi ihrem Tuä nöd an di mögliche Folge.

Und denn git’s no Zocker’type, Spieler, wo ihres Risiko kalkuliäred: si dänked, und wenn mer mich ver’wütscht, was chan mir scho passiäre? Irgendwiä ziäh ich mich sicher heil us dr Affäre. - Leider gits gnuäg Biispil, wo Misse’täter mit gnuäg Aawält und gnuäg Rekürs un’gschore dervo chömed.

Also, s Liächt isch doch nöd alles.

In dem Moment, wo mer en Missstand entdeckt, isch es immer no en Missstand.

Und mir gsehnd hüt im fläche’deckende Liächt vo dr Öffentlichkeit vili Missständ.

Mängsich luägt mer au aifach zuä, wi sich s eso entwicklet, und tuät nüt dergege.

Mazedonie isch in däm Zsäme’hang es positivs Bispil.

Nachdem d Wältöffentlichkeit in Kroatien und Bosnien und im Kosovo immer schön brav gwartet hätt, bis dr Bürger’chriäg eso richtig voll in Gang cho isch, hätt mer in Mazedonien Stabilisierigs’truppe stationiärt, bevors zum Fläche’brand cho isch.

Im Sudan isch dr Völkermord zwar scho im Gang, vilicht chan mer en aber tatsächlich stoppe, solang nonig ali Bewohner vo dr Region Darfur uus’graubt, ver’tribe, ver’hungeret oder grad direkt tödet worde sind.

Liäbi Gmaind,

dr Epheser’briäf hätt e sehr e wirk‘kräftigi Sicht vom Liächt.

„Was ans Licht kommt, wird selbst Licht“, heisst s doh.

Das Liächt isch also aa’steckend.

Di hütig G’fahr, dass mer im Liächt sehr genau gseht, was schiäf lauft, gliichziitig aber d Zügel schleife loht und gar nüt Effizients dergege unternimmt – diä Gfahr gseht dr Epheser’briäf nöd.

Oder hätt oise Predigt’text aifach e chli en aktiveri Läbens’uffassig?

Maint er vilicht gar nöd, dass ois s Liächt aa‘steckt, währenddem mir derbi in perfekter Geruhsamkeit zruck’g‘lähnt bliibed?

In dr Bible gits kai Musik’note.

Es werded verschideni Melodiä erwähnt, aber nöd in musikalische Note’wärt fest’g’halte.

Derfür händ mir etlichi Liäder’text.

Ais Bispil lieferet Vers 14 vom Predigttext:

„Darum singen wir: ‚Wach auf, du Schläfer! Steh auf vom Tod! Und Christus, deine Sonne, geht für dich auf.‘“

Also, dass mer uf’hört pfuuse und dass mer uf’stoht, das setzt dr Epheserbriäf als selbst’verständlich voruus!

Das chan und muäs s Liächt nöd für ain mache. Dr Job vom Liächt isch es, hell z sii und s aim z zaige, wiä s isch.

Oise Job isch es, d Konsequenze z züche us däm, was mir im Liächt gsehnd.

Amen.

Liturgie

01Eingangsspiel

02Gruss

03Lied EG 519,1-4 „Trittst im Morgenrot daher“

04(stehend / gemeinsam) EG  218 Gloria

05Lied EG 323,1-3 „Komm, sag es allen weiter“

06Predigttext

07Lied EG 249,1-3 „Erd und Himmel sollen singen“

08Predigt

09Zwischenspiel

10(stehend / gemeinsam) Unser Vater

11Abendmahlslied EG 456, 1-3.1 „Liebe wächst wie Weizen“

12Einsetzungsworte

13(HelferInnen treten herzu) Austeilung an die HelferInnen

14(Gemeinde tritt herzu) Austeilung an die Gemeinde

15(stehend) Dankgebet (danach: HelferInnen und Gemeinde setzen sich)

16Lied EG 518,1-4 „Grosser Gott“

17Abkündigungen: Abdankung und Trauung

18Leidstrophe EG 674,3

19Kollekte:

20Mitteilungen:

21Schlussstrophen EG 518,5-6

22(stehend) Segen

23(sitzend) Ausgangsspiel